هذه مذكرات طالبة ثانوي وجدتها في احد المنتديات فاحببت ان تشاركوني متعة قرائتها ,,,,,,
السلام عليكم
حبيباتي يسعدني اني اشارككم مذكراتي الي كتبتها قبل (3)شهور
وارجو التشجيع كما عهدت ذلك منكم,,,
المذكرة الاولى ،،،،،،،
الجمعة 6/5
انا روان اكيد تعرفوني وهل يخفى القمر
ما تعرفون كيف حالتي ليلة السبت,,,والصداع شغال من صباح الجمعة
ورجولي تعورني وفي حالة غثيان اذا شفت الكتب ولا بس لمحتها.
ولا الحين عندي حالة ارق شديدة ماأقدر انام وكل محاولاتي مع امي اني غيب
مانفعت وصارت حركاتي مكشوفة قدامها.
خاصة لما جيت عندها المغرب وانا ماسكة راسي
وقالت لي :فاهمة فاهمة ........ لكن مافي غياب.
يالله يالاحباط،،،،،،،،عطوني حيلة مع امي
المصيبة ان امي تربوية ومعلمة.
اه...اه..... شفتو القهر كيف
المهم توكلت على الله وقررت انام وانا عقلي شغال
الي زايد الطين بلة ان الحصة الاولى (انجليزي)
الله يعين كل طالب ليلة السبت ويرحم الشاعر الي ما ادري وش اسمه يقول:
يضيق صدري لا طرو ليلة السبت...
ليت اليالي كلها ربوووووووووعي.
وحطيت راسي وثواني الا انا فنوم عميييييييييق.....
السبت7/5
هذا يوم المغامرات والاكشن
تبون تعرفون اش صار ؟؟؟؟؟؟؟؟؟؟؟؟؟
تابعوا المذكرة الثانية
تحياااااااااااااااااااااتي
المذكرة الثانية.............
السبت 7/5
يوم كئيب خسارة اني اكتب عنه مذكرة لأنه اول أيام الشقاء لكن بسبب مامر فيه من أحداث راح تعجبكم >>> واثقة .
حبيت أخليكم تضحكون شوي ...معاي ماهو علي .. ها ها ..
بدأ صباح ذلك اليوم ( ياسلام لغة عربية !!!!!!!!!!! متأثرة بالوالدة) ما ابغي اخرج عن الموضوع .... إذا خرت ذكروني ... تراني أضيع ... ( نرجع لمحور مذكرتي )
المهم اني قمت متأخرة من النوم وعلى مااستوعب الي يصير ,,
تصبحت بوجه اخوي كروم (عبد الكريم) وهذا عمري ما تصبحت بوجهه ومر اليوم على خير ,, سميت بالله وتعوذت من وجهه ورحت أتجهز خلصت ورحت افطر وانا مفتحة عين ومغمضة عين حتى مايطير النوم وطيران على سيارة أبوي أكمل النومة .......
وأخيراااا وصلت المدرسة .......
يلا ابدوا الاستعداد واربطو الأحزمة بدا الضحك والهبال ,,,,على فكرة كل المواقف الي راح اذكرها حقيقية وبعضها بالغت في الوصف لزووووم الكشخة ....
دخلت المدرسة وانأ متحمسة أدور شلتي ( ايش تبون )
(ترى ماهو انتم هذا أسم شلتي الموقرة بالله ايش رايكم فيه ترى مأستغنى عن ردودكم ,,,)
المهم لكن دخلت متأخررررررررررة مرة وما لحقت عليهم ,, والله لا يوريكم تصبحت بالوجه الحسن الأشد أثر من وجهه أخوي كروم ( أبلة سعادة ) وقسم أنها قمة التعاسة ,,
أول ماشافتني ابتسمت ابتسامة شيطانية ورفعت حاجبها الي رافع ضغطي وقالت: هلا والله !!!!!!!!!!!!!!!!! هلا شرفتي ونورتي ..............زين الي طحتي بيديني ..
( وتعالو شوفوني تعالوا تقولون قالب ثلج وذاب والله جيري يوم شاف توم .. )
رحت التفت يمين.. يسار.. مافي الحوش ألا إنا وحائط الصد ( الست تعاسة ) الله يسامحك يايمة قلت أمس بغيب قلبي حاس اني بطيح بيدها بس ما رضيتي ....
وصراحة وبدون إحراج ما راح أقولكم ايش سوت فيني ,, وكيف مسحت بوجهي بلاط الحوش كله ,,
وبعد ماخلصت من مدحها لي خلتني أطلع .. هذا كله من وجه كروم صدقوني حتى طلعت مثل ونشرته بين عائلتي هو
( تصبح بوجه كروم ,, سعادتك ماتدوم )
وانأ رايحة فصلي اتخبط بهالجدران وجهي مربعات وأخلاقي قفلت من الكلام الحلو الي سمعته ,, وقفت عند الباب أبغى أتاكد الابلة فيه ولا غايبة
ما سمعت غير رجة البنات قلت اكييد غايبة سميت بالله وفتحت الباب سلمت وبدون ما التفت مشيت سيده على مكااااني
ـــ هيه هيه على وين أخت روان وكالة من غير بواب ؟؟؟
وقفني صوت ابلة سحر العصبي لفيت عليها وقلت لها نعم .. ( بلمت ... جمدت .. )
قالت بتريقة : نعم الله عليك وبعصبية قالت .. داخلة متأخرة وين كنتي مرت ربع ساعة على الحصة يلا بره ...
ما خليتها تكمل كلامها حطيت الورقة على الطاولة وقلت ببرود : هذي ورقة التأخير من أبلة سعادة ورجعت لمكاني وخليتها تعصب وتزبد وترعد وانأ ولا همني كافي علي ابلة تعاسة وكلامها الي يسد النفس ..
ألين زهقت وراحت تكمل الشرح .
وبيني وبينكم أحيانا بعد أي تهزيء من النوع الثقيل تجيني برودة أعصاب تقهر والله أستغرب من نفسي كيف سويت كذا
ومااعطي ألأبلات بال ... وبعد لان أمي بعض المدرسات عندنا زميلاتها وهذا الي مقويني وكم مرة أطيح بيد تعاسة وتنقذني ابلة بسمة وابلة سامية من العقاب >>> هذا الشي الحلو فالموضوع بس الي يقهر ان كل تحركاتي عند أمي ماقدر أتنفس..
ــ من الشين الي مقفل أخلاقك ياحلو ..
غصب عني ابتسمت ولفيت عليها ( هذي هنادي توائم روحي بالشلة والانتيم حقتي لها وقفات معي ما انساها راح تعرفونها بعدين ) وقلت : تعاسة ..
ــ لااااااا ياحرااااام تعاسة مرة وحدة والله أمها داعية عليها اليوم .
(هذي الطويلة حنان راعية ضحك وهبال دايم تورطنا وهي تطلع منها زى الشعرة من العجين أحلى عمود إشارة بالمدرسة )
ــ والاخت تعاسة وش جابها عندك
(هذي رحوبة مرحة وحبوبه ومرررررة قزمة متعقدة من حنان إذا شفتهم جنب بعض تموت ضحك من فرق الطول بينهم)<<< طبعا هذي ماهي أسمائهم الاصلية خوفا عليهم من الفضيحة والعار ... احم قصدي الشهرة ...
لفيت عليها وقلت : قرادتي الي جابتها عندي وهي ما صدقت تشوفني مسحت فيني البلاط ..
حنان: أكيد هي شايلة عليك من يوم اشتكيتي عليها
هنادي: والله بردت خاطري فيها أحسن تستاهل تعاسوه..
أنا: لازم أرد لها التهزيء الصراحة كرهتها زود ماني كارهتها..
ــ ( لايجي ببالكم أنا شلة مستهترة ترانا وقت الجد نعجبكم ,, احنا شاطرين ومؤدبين <<< كثري منها ..وما نطلع الا من الأوائل )
ــ روااااااان بسرعة وبدون أي نقاش بره ....وبعصبية يلاااا تحركي
تحركت على قولتها هذا اليوم شؤم من بدايته ,,,,,, طلعت وجلست أدور في الممر مرت ثواني بس وإلا شلتي الحلوة كلها طالعة لا تستغربون احنا نوقف مع بعض يعني الفصل ماله طعم بدون الثانية ,,,
شوي وقلبناها سوالف كل وحدة تحكي ايش صار لها الخميس والجمعة ...
انتهت الحصة ولما طلعت ابلة سحر عطتنا نظرة احتقار من فوق لتحت ههههه (حركات ابلة سحر توزع نظرات
أقص يدي إذا فطوم هي الي معلمتها النظرة )
مرت الحصة الثانية والثالثة على خير ,,, والفسحة بعد لكن المصيبة الي صارت بعدين .. تخيلو .. ( تفتيش )
بعد ما طلعنا من الفسحة وقفنا عند الفصل لان شفنا البنات حايسات والفصل منقلب فوق تحت ,, وإحنا واقفين
قالت رانيا بسرعة لما شافتنا : ( ايش تبون ) تفتيش بسرعة الي عندها شي تطلعه
ما سمعنا غير شهقة قوية .. حنان فاتحة فمها على أقصى اتساعه ( حلوة أقصى ) وعيونها مبققة .. ويدينها متصلبة .. وبعد ما استوعبنا المنظر قالت ... بنات .. الروايات في الشنطة ..
ــ لالالالالالالالالالالالالالالالا .. هذي أنا صرخت : من أي مستوى ..
قالت حنان : مرتفع ..
لالالالالالالالالالالالالالالالالالالالا أنا مرة ثانية ..
هنا سمعنا صرخة عبقرينو .. لقيتها ... يلا التنفيذ ...
بسرعة تحركن قبل لايجي دور فصلنا في التفتيش ..
( ودتنا فداهية الخطة )
أخذت هنادي الروايات وكان عددها خمسة وأعطتها لي وقالت: روان حطيها على عمود المروحة بالطول
طلعت على الطاولة وانأ ارجف أخاف المح جني قصدي ابلة وبسرعة وزعتها على المروحة
ونزلت من الطاولة على مكاني وثانية وكل وحدة من البنات فمكانها بنفس الوقت دخلت تعاسة والمسطرة بيدها ومعها أبلة كوثر مشرفة النظام وابلة عواطف المساعدة
وحنا يدنا على قلوبنا... أصلا أشك إذا قلوبنا مكانها ...
دخلت تعاسة وقالت : الكل بره الفصل تحركوا
خرجنا أنا وشلتي وعيونا على المروحة ,,
شوي والاخت كوثر تمد يدها على مفتاح المروحة وهي تقول: ايش الريحة هذي .....
هنا رحنا وطي أنا والشلة ,,,,
تدرون ايش صار تابعووووووني في تكملة المذكرة
لا تحرموني ردودكم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تااااابع المذكرة الثانية .... (2)
شوي والاخت كوثر تمد يدها على مفتاح المروحة وهي تقول: ايش الريحة هذي .....
تخيلو المنظر معي بالبطيء أبلة كوثر ماسكة زر تشغيل المروحة ,, وتعاسة ماسكة شنطة وحدة من البنات بدت التفتيش << ماعندها وقت ......
وابلة عواطف رايحة الجهة الثانية من الفصل .......
وإحنا ..لا مو بس احنا...
الفصل كله عينه على المروحة الي بدت تدور شوي <<< هذي أصعب لحظة مرت علي
ماهمني شي الا أمي إذا درت ايش بتسوي وأكيد قبل تصفر الحصة الخبر عندها ....
أما شلتي فحدث ولا حرج <<< ههههه كل وحدة تفكر بشي .......
وحنو الي ورطتنا خايفة يصادرون الروايات وهي بالقوة حصلتهم والى ألان تقولنا أكيد تعاسة عطتها هدية لبنتها .....
المهم دارت المروحة ودارت معها روسنا ,,,,,,, وتوزعت الروايات كل وحدة بجهة
<<ههههههه وحدة طاحت عند رجل هنادي هذا أثبات أكيد أنها صاحبة الفكرة ,,,,,
ثلاث شهقات بترتيب حلو من ألابلات ,,, وعيونهم مفتوحة عا الأخر تناظر العصافير الي تتطاير .......
هدووووووووووووء ............ خفقان قلوووووب ............ توتر فضيع....... والاهم خوف ....
شوي واستوعبوا (الثلاثي المرح) الموضوع ,,,
وبصرخة هادرة .....
ــ ايش هذاااااااااااااااا مين قليلة الحيا الي تجرأت وجابت قلة الأدب هنا ,,
رفعت راسي وشفت أبلة تعاسة ما سكة الرواية وعليها صورة بريئة تهبل ؟؟؟؟؟؟؟؟؟؟ ,,,,,
صرخت تعاسة مرة ثانية : تكلمووو لمين قلة الأدب هذي ؟؟؟؟؟
ولا وحدة من البنات قدرت تفتح فمها بكلمة ,,,,,,,
<< هذا موقف أتمنى من كل قلبي مايصير لأي وحدة منكم لأني عشت لحظات عصيبة ...
المهم ماقدرنا نتكلم ......
قالت عواطف بعصبية : إنا اعرف كيف تنطقون ,,,, قدامي عا الإدارة كلكم ....
تكلمت نشمية بصوت يرتجف<< هذي الاولى على مدرستنا : ابلة هذي مو لنا
قاطعتها تعاسة بصرخة : أنكتمي <<<<< والله اني ماسكة الضحكة بقوة مو بس إنا .... كل شلتي ,, بس مع جو التوتر الفضيع الي احنا فيه بس الله ستر وبلعتها >>>>
كملت : ويلا قدامي عا الإدارة والله لأخليكم تندمون تحركوا بسرعة ......
مشينا معها للإدارة ,,, مرفوعين الراس وروسنا شامخة ,,,, << احلفي ...
وحنان كل شوي تدقني اول شي ماعطيتها وجه .. ولما كررتها رفعت ضغطي وتحركت عضلاتي ,,,,
مديت يدي بدفها بمزح ... ضربتها بخفيف ,,,,,,,, لكن فيه عيون كشفتني بالجرم .. تستنى علي الزلة ....؟
ابلة كوثر كانت ورانا لا ومعها رواية وتقلب فيها عجبتها من اسمها ( حب ضائع ).. ... تعرفونها ...
ابلة كوثر : روااااااان ايش قلة الأدب هذي تضربي زميلتك وقدامي بعد.......
وأكيد تعاسة ما يفوتها الموضوع دام فيه روان ,,,,,
تعاسة : أخت روان انت ماكفاك الكلام الي قلته لك الصباح <الا تفضحني قدام أعدائي>
كملت : لازم يعني تخليني أطلع الوجه الثاني << أصلا هذا وجهك من يوم عرفتك ,,,, ,,,,,
الله يسامحها ابلة سعادة كرهتني بالمدرسة أكثر من مرة جبت أمي تتفاهم معاها والصراحة مرة
خلتني أبكي من القهر ... هزئتني قداااام الفصل كله (الي يسوى والي ما يسوى) ... عشان
دفتري كان مع رحاب وهي غايبة طيب إنا ايش
عرفني ان رحاب بتغيب.. و ايش عرفني كمان ان حضرتها تبي دفاتر الشاطرات أمثالي اليوم لان المديرة طالبتها
يلا الحمد لله اني افتكيت منها للأبد >>
ـ انا وجهي راح ألوان وأشكال مدري شقول لكن والله كان نفسي أشدها مع كشتها وأفرغ كل القهر الي بداخلي فيها ........
قلت لها : أبلة ماني قاصدة أضربها انا امزح معها ....
قالت حنان تنقذني من الورطة : ابلة عادي ما تعور. << لا والله ماتعور ,,, ياعيني بتكحلها عمتها ..
لكن الحمد لله أنقذني إنا وصلنا الإدارة ..... وصااااار تحقيق طويل عريض .. ومحاضرات عن التربية وان المدرسة مكان علم ,,, طبعا هذا كله يقولونه بصراخ وعصبية غصب الوحدة ما تقدر تفتح فمها بحرف ,, راحت حصة ونص
يعني احنا الحين بنص الحصة الخامسة << دايم يوم السبت يكون أطول يوم دراسي ,,,
اول شي ماحد تكلم .. ولما هددونا بالفصل وتنقيص درجات السلوك ... والاهم استدعاء أولياء الأمور,,,,,,,
تكلموا البنات الشاطرات وقالوا إنها لحنان ......
ـ حنااااااااااااان لا ما أصدق ,,,,,,,,, صرخة استنكاااار شديدة من أبلة كوثر << ههههههه لو تشوفون وجه حنان تحفة تغير 180 درجة،،،،
ــ معقولة حنان الشاطرة المؤدبة تجيب الأشياء هذي ,,,
حنان عادي أصلا أكثر من مرة نزلت للإدارة لأن لسانها يبيله قص على قولة ابلة تعاسة
بس صرخة ابلة كوثر الغير متوقعة ...خلت وجهها يصير إشارة مرور معتبرة ....<< بس اكتشفنا شي خطير إنا وشلتي
ان ابلة كوثر تحب حنان ههههههههه >>
وبدا تحقيق ثاني قوي مع حنان وكل المدرسات حضروا أكيد هذي عضوه من (ايش تبون) المشهورة بمدرستنا ....
وأكيد احنا ما قصرنا ,, وقفنا مع حنان وقلنا إنا احنا الي طلبناها منها وانا اعترفت اني حطيتها فوق المروحة
وبعد كم بنت من المعجبات بشلتنا<< أحم أحم ,, وقفوا معانا وقالوا أنهم كانوا معنا .......
وبعد عناء انتهى التحقيق وكان من نتائجه,,,,
1ـ فصل حنان يومين وحسم 5 درجات من السلوك ..
2ـ حسم 5 درجات من شلتنا لأنها مشتركة فالجريمة. وبعد التستر على المجرم ..
3 ـ تكريمنا بالطابور,,,,, احم ..
4ـ كتابة تعهد بعدم إحضار مخالفات تضر بسمعة المدرسة..
5ـ مصادرة الروايات ومصادرة قلب حنان الي ما قرت وحدة منها ..
وطبعا تعاسة ما قصرت ما خلت كلمة ما قالتها للشلة عموما ولي خصوصا ,,,
وانا طبعا اخذت عتاب طويل وشديد من صديقات أمي .. .. وعطوني نصايح كيف أختار الصديقات الصالحات .... الخ ,,,,
والاهم من هذا كله أمي لازم تدري بالموضوع ,,,,, هنا المشكلة ,,,
كرهت نفسي بهذا اليوم لدرجة تمنيت الأرض تنشق وتبلعني << انتو تخيلوا وحدة من زميلات (امك) تكلمها وتقولها بنتك وصحباتها جايبين
روايات حلوة للمدرسة وصادروها .. و. و. و .و ..... ألخ ,,
ايش بيكون موقف أمك مع الي تكلمها ,, وكيف نظرة أمك لك بعدين بتتغير ولا كيف .... خصوصا ان امي مدرسة مثل ما قلت لكم قبل <<
رجعنا الفصل وإحنا منتهين عالاخر ... حصتين ونص واقفين وهذا غير الضغط النفسي الي مرينا فيه ,,,
جلست مكاني وانا شايلة هم الرجعة للبيت ,, وافكاري توديني يمين ويسار ,, قالوا لأمي ولا لا ,,,
وإذا رجعت البيت امي ايش بتسوي معي ,,,,,,,,,
فجأة ــ ههههههههههههههههههههههههههههههههههههه
ــ هههههههههههههههههه ههههههه هههههههههههههههههه
انا فهمتها على طول وضحكت مع هنادي لين طلعت دموعنا من شدة الضحك ,, تذكرت تعاسة لما قالت لنشمية (انكتمي)
الصراحة موقف رهيب ,,,, شوي وفهموا حنان ورحاب لأنا بصعوبة نطلع الحروف ونحاول نرتبها .. وهم ما قصروا
ضحكوا وعلقوا لين شبعوا ,,,,,
الصراحة نسيت همي والمشكلة الي بتصير لي فالبيت .......... وكله بفضل ربي ثم شلتي الله لا يرمني منهم .......
هذاااااااا نهاية يوم السبت ..... ونهاية المذكرة الثانية ..
ابي ردوووووووووووووووووووودكم
الثلاثاء سبتمبر 22, 2009 8:05 am
