حتووووووووته حصلت لنا ..

حتوته حصلت لنا
السلام عليكم ...
أخباركم ....

قبل 5 سنوات كنا بالمخيم حقنا .. وكان جاينا ضيوف اللي هم خوالي وخالاتي وعيال عم أبوي مع حريمهم وأنواع الوناسة والفله .. يوم جاء العصر ويجي واحد من خوالي قال يالله يابناتي وبنات خواتي (أمشوا أبطعس بكم وكانت سيارته صغيرة ( كانت الأرض رطبه عقب المطر ) .. وحنا مناخيرنا بالسماء من الفرحة وطيران للسيارة ركب ثنتين قدام وأربع وراء يالله كفتهن السيارة .. وأثر السالفه مهب اللي نبي مادرينا إنه متهوووووووووووور بالسواقه والله نضحك من غير شعور بس علشان ننسى الخوف وعقب مادارت روسنا نزلنا عند المخيم .. بس مابعد نزل اللي بالراس نبي نطعس ثانية ( لاقين أحد معطينا وجه ) وننشب بحلق ولد خالتي معه سيارة هايلكس غمارتين وماكمل شهر وهو شاري السيارة ووقته كان عمره 20 وماكنت أتغطى عنه أنا وخواتي لأنه يكون أخوي من الرضاع ومتعودين عليه.. والله ونصير زرار بالحلق إلا تطعس بنا مالنا دخل .. يحاول يقنعنا يقول خلو التطعيس بكرى ماودي الحين .. وحنا ملزمين ..قال بشرط ولا وحدة تركب صندوق السيارة ماودي هالمرة تركبون .. ( متعود على هبالنا نركب بالصندوق ونوقف ) قلنا خلاص تم .. والله اللي بالسيارة كان عددهم 11 نفر قسم بالله .. السواق وبجنبه أخته وبحجره أخوه الصغير وبجنبه أختي وبحجره أختي الصغيرة طبعا هذا اللي ركب قدام .. نجي للي وراء وياسلااااااااااام وراء فيه ست أنفار وكل وحدة بحجر الثانية خخخخخخ حتى كان معنا بنت خالي وكانت متغطية ومادري ليش راكبة معنا !!! والله مادري وش المسكة اللي جتنا إلا نركب كلنا ذاك اليوم ... قبل مانمشي جت خالتي أم السواق قالت فيه مكان لي ؟؟ ودي أركب .. قلنا شوفت عينك مالك إلا الصندوق !! جت بتركب بس هونت قالت فشيله أركب وأترك ضيوف أختي .. قلنا أجل الله يسهل عليك ومع السلامه ..

الموووووهيم تمشينا بالنفود قلنا لا مايصلح كذا ( لنا وجه بعد نهرج ) نبي تسيف بنا ( واللي مايعرف وش معنى تسييف هو تطعس وأنت ترقى النفود وإذا جيت على حد سيف النفود بسرعه تنزل وأنت مايل مادري صح علي الشرح وإلا لأ أنا فاهمته بس مادري وشلون أوصله ) قال طيب ... ويبدا يسيف على النفود .. وحنا نسيف رقينا نفود كان تحته ناس كاشتين ومادرينا عنهم هم أنهبلوا لأنه اللي يشوفنا يقول ذا بيطيح علينا .. وكنا بايعينه نضحك ..>> القلوب وقته خلاص ماتت .. ونسمع صوت الرجال اللي جالس معهم يدعي بس والله ماندري وش يقول .. تعديناه .. وجينا نبي نسييف على نفود ثاني وكان مرتفع مررررررررره .. رقى وأول ماوصل حد السيف وقبل ماينزل إنفجر الكفر الأيمن اللي قدام وأنقلبت السيارة قلبتين وأستراحت بالأرض على الكفرات الباقية ... أذكر أول مأنقلبت السيارة خميت بنت خالتي اللي بحجري ورفعت يدي الثانية على سقف السيارة >> من البراءة أحسبه ماراح يجين شي ... وأختي الكبيرة كانت تقولنا تشهدوا تشهدوا .... أول ماأستراحت السيارة بالأرض على طول نزل ولد خالتي قال يالله بسررررعه بسرررررررعه أنزلن طبعاً البيبان ماأنفتح إلا باب السواق والبيبان الثلاث الباقية شبابيكه تكسرت .. طلعنا من الشبابيك وقعدنا بالأرض وجيهنا ماتنوصف من الروعة وصايرين مغبرين تقل شهبان .. والبنات الصغار ماسكينه صياح ومناشق من الروعة ..... طبعاً ماجانا إصابات بس كدمات بسيطه .. وأنا طبعاً مالت رقبتي على جنب وماتعدلت إلا بعد كم يوم وعقب ماصرت مطنزه عند أخواني وخوالي .. وأختي الكبيرة تحت عينيه ليمنى كدمة زرقاء اللي يشوفه يقول هذي وحدة معطينه بوقس ... وأختي الثانيه صار عنده وجع قوي بالقفص الصدري .. والباقين إصابات طفييييييييفه ..
كلنا يالبنات جلسنا بجنب السيارة وولد خالتي بجنبه الثاني يناظره ووجهه مصدوم .. طبعا سيارته أنكسرت الشبابيك كله وأولهن القزاز اللي قدام والكبوت رياح عدام وسقف السيارة اللي بالمرتبه اللي قدام منخفس ..

اللي درى بالحادث وشاف اللي صار ولد خالي كانت سيارتهم اللي يطعسون به نشبة بالنفود .. وعلى طول راح للمخيم وعلم الرجال والله ولا سيارة عند المخيم إلا جت تشوف اللي صار .. واحد من خوالي أخذنا كلنا يالبنات وودانا للمخيم .. خالتي أم السواق أول ماشافات أشكالنا اللي توحش بدت تصارخ ولدي وين ولدي قلنا مافيه إلا العافيه .. بدت تصارخ بشكل هستيري قالت تكذبون ولدي فيه شي جيبوه لي .. وكان الوقت توه داخل المغرب .. وأغمى عليه شوي لين جاء واحد من خوالي مطوع ويقرا .. قرا عليه شوي وصحت وهي تهذري أبي ولدي .. جبنا له ولده وهدت شوي عقب ماتأكدت إن مافيه إلا العافية ..

السيارة سحبوه لين وقفوه عند خيمة الرجال وأول ماجبنا ورقة من عند عمي وديناه للورشة .. وأبوي عقب اللي صار قال لناأنا وخواتي ..(عساكن بحرج إن طعستن ثانية !!! )

وأذكر خالي المطوع قال أنا شايف حلم مهب زين وفسرته إنه بيصير شي مهب زين بالمخيم بس ماراح يتضرر أحد .. يقول أحاول أكذب تفسير الحلم بس أنا حاس إنه بيقع .. أذكر قلت له الله يعافيك لا عمرك تحلم إلا ويصير تفسيره زين >>> حمقه !!!
بس الحمد لله الضرر بالسيارة ولا بنا .. أذكر من بكرى الصبح ولد خالتي وخالي وأخواني وخواتي كانوا يلعبون كرة طائرة ويصوتون لي عشان ألعب أول ماجيت أنواع الضحك والتطنز علي عشان رقبتي والله أناقز عشان أرمي الكورة ورقبتي مايله !! يوم شفت السالفة طالت وهم يتطنزون والله وتخنقن العبرة وأطير للخيمه وأتركهم >> يقالي زعلانة ..!!

وعقب ذيك السالفة كل مارحنا للبر يقول أبوي مافي تطعيس !!

والعام كان آخر يوم لي بإختبارات الكلية واللي جاي ياخذن أخوي الكبير وكان توه جاي من الرياض .. دق علي قال أنا اللي أبجيبك ,.. ركبت وسلمت عليه قال ماتبين تمشين تختيمة آخر يوم قلت قدام .. ماشاء الله وين ودان .. ودان للبر وهات ياتطعيس وأنا بآخر صوتي أصارخ نزلن مابي أتمشى لأن الحادث اللي صار لنا على طول جاء قدامي .. وأخوي يضحك من قلب على صراخي يقول هذا وأنا ماسويت شي .. حسبي الله على إبليس .. يوم شاف إنه وصلت معي رجعن للبيت ...

وتوته توته وخلصت الحتوته .......

الحمد لله على السلامه

الله يعطيك العافيه على القصه

اللؤلؤه المصونة كتب:: الحمد لله على السلامه

الله يعطيك العافيه على القصه

الله يسلمك حبيبتي ويعافيك ,,

تشكرات كثيرات على المرور ,, flower

هههههههههههه

الحمدلله على سلامتكم ..
يووووه .. لو أنا بمكانك كان ما يحتاج له تفكير ..
بموووت على طووول من الروعه .. > خوااااافه ..

لكن مو هذي مكانه بالخبال والصرقعه ..!
أعذرين مضطره أنقله ..

( أستغفر الله وأتوب إليه )

قبل مانمشي جت خالتي أم السواق قالت فيه مكان لي ؟؟ ودي أركب .. قلنا شوفت عينك مالك إلا الصندوق !! جت بتركب بس هونت قالت فشيله أركب وأترك ضيوف أختي .. قلنا أجل الله يسهل عليك ومع السلامه

ههههههههههههههههههههههههههههههههههههههـ ياويلي كسرت خاطري وانتم ماعندكو وقت على طول مع السلامه
كان نزلت وحده منكم وتركت خالته تركب

يعني بتحركن ههههههههههههههههههههههههههههههههههه

************
وقبل ماينزل إنفجر الكفر الأيمن اللي قدام وأنقلبت السيارة قلبتين وأستراحت بالأرض على الكفرات الباقية ...

يماااااااااااااااااااااااااااااااااااااامي

الحمدلله على سلاااااااااامتكم

تعووووووووودوله مرة ثانيه

{ نـغـمـ كتب:: هههههههههههه

الحمدلله على سلامتكم ..
يووووه .. لو أنا بمكانك كان ما يحتاج له تفكير ..
بموووت على طووول من الروعه .. > خوااااافه ..

لكن مو هذي مكانه بالخبال والصرقعه ..!
أعذرين مضطره أنقله ..

( أستغفر الله وأتوب إليه )

ههههههههع والله مادري وين أحطة ياحول

تشكرات على مرورك الحيلو ,, يكركر

هدوء المطر كتب:: قبل مانمشي جت خالتي أم السواق قالت فيه مكان لي ؟؟ ودي أركب .. قلنا شوفت عينك مالك إلا الصندوق !! جت بتركب بس هونت قالت فشيله أركب وأترك ضيوف أختي .. قلنا أجل الله يسهل عليك ومع السلامه

ههههههههههههههههههههههههههههههههههههههـ ياويلي كسرت خاطري وانتم ماعندكو وقت على طول مع السلامه
كان نزلت وحده منكم وتركت خالته تركب

يعني بتحركن ههههههههههههههههههههههههههههههههههه

************
وقبل ماينزل إنفجر الكفر الأيمن اللي قدام وأنقلبت السيارة قلبتين وأستراحت بالأرض على الكفرات الباقية ...

يماااااااااااااااااااااااااااااااااااااامي

الحمدلله على سلاااااااااامتكم

تعووووووووودوله مرة ثانيه

هههههههههههع ,,

والله لو أنتي شايفة أشكالنا حزين

إلى الحين الموقف ببالي عجزت أنساه ,, وقته كأني أشوف الموت بعيوني حزين

تخيلي تنقلب فيك السيارة أكثر من قلبه حزين

وتطلعين ما جاك شي حزين

واللي يشوف السيارة

يقول اللي داخل السيارة أكيد ميتين حزين

,, الحمد لله اللي طلعنا بالسلامة ,,

وولد خالتي هذا شكل شعره مثل كذا مبسوط

وإلى الحين على خباله ما عقل يضحك

الله يزوجه ونفتك من مراهقته اللي اللى الحين ما راحت وصل عمره 24 وهو على حاله يضحك