روايـة ( الحــــلم المستحــيل ) للكــاتبة قـــــلائـد العـــ

اتوووقع انها رائعه اختي من تحمس الاعضاء معاك

بس كمليها واقراها ان شاء الله

تقــــــبلي مروري

تــــــــــروكي

نغم ياحبيبتي لا تتأخرين

كذا ننسى الأحداث

بسرعه ياحبيلك

آآآسفه والله على التأخير ..
بس الظروف أقوى مني ..


وهذا الجزء .....


الجــــــــــــــ 9 ـــــــــــــزء

......... عند أحمد ..
أحمد جالس مع غيداء ..

أحمد : جاهزة للسفر بكرا ؟؟
غيداء : إن شاء الله ..
أحمد : ألا على فكرة فيه زوار يبي يجون الحين ؟؟
غيداء مستغربه : الحين !!!!!

في هاللحظة رن جوال أحمد ورد عليه

أحمد : الطيب عند ذكره ..
عبدالله : بسم الله .. الناس تسلم أول وتقول صباح الخير
أحمد : آآآسف يالحساس .. مرحبا صباح الخير ..
عبدالله : صباح النور .. أقوول لا يصير أفطرتوا
أحمد : أيييه .. من زمااااان
عبدالله : صاادق .. أنا ما قلت أنتظرون على الفطور ..
أحمد : لا أمزح ..
عبدالله : زين أفتح لي الباب لي ساعة واقف ..
أحمد : زين .. مع السلامه ..

سكر الجوال وناظر غيداء شاف الحيرة على وجهها .. ابتسم لها وطلع ..

أحمد : هلاااا
عبدالله : هلا بك ..
أحمد : تفضل .. شوف أختك .. أنا منب داخل معك .. بنتظر هنا
عبدالله : أحمد خااييف ..
أحمد وهو يدفه من ظهره : يالله توكل على الله ..

..... دخل عبدالله للبيت وكان هادئ .. دار بنظراته في البيت يدورها .. ووقفت نظراته عند وحده جالسه على الكنبه .. وتناظره بحيره .. ومر زمن وهو يناظرها وهي تناظره ..

...... غيداء كانت جالسه تفكر بأحمد .. حركاته غريبه .. حست بحركة حولها .. رفعت نظرها .. شافت شاب واقف .. معقوووول .. وبعد أربع سنين أشوفه .. معقووووووله .. مستحيييل ألي أشوفه خياااال .. خيااااال ..

... صاروا يناظرون بعض من دون ما يتكلمون .. وأخيرا نطق عبدالله
عبدالله : غيداء ......
غيداء لا ألي أشوفه حقيقة مب خيال .. لو كان خيال كان ما تكلم .. هذا عبدالله .. أخوي عبدالله ..

..... غيداء بعد ما أستوعبت نزلت دموعها .. بس ما تكلمت ..
عبدالله يوم شافه تصيح قرب منها : غيداااء ..
غيداء قامت وراحت جهة أخوه : عبدالله ..

........ وضموا بعض وجلسوا يبكون ..

عبدالله بعد فتره : غيداء أشتقت لك .. أشتقت لك ..
غيداء : عبدالله ليش تتركنا ؟؟ نهون عليك !!

عبدالله أبعد غيداء عن صدره : غيداء غصب عني .. والله غصب عني ..
غيداء ما ردت ..

عبدالله قرب يده من خدود غيداء ومسح دموعها وجلسوا على الكنبه

عبدالله: غيداء .. بعد وفاة أمي بأسبوع تقريبا جيت لبيت أبوي .. بس صرخ بوجهي وطردني ..
غيداء : حتى مشاري لما جاء يزورنا في نفس اليوم ألي ماتت فيه أمي طرده أبوي ..
عبدالله : مشاري .. أشتقت له ولسواليفه .. آآآآه .. قوليلي وش تعرفين عنه ؟

غيداء : كان يرسل لنا بأوراق .. ويقول لنا عن أخباره ونرد عليه .. بس بعد ما سجن صرنا نرسل له بس ما يرد علينا .. بحكم أنه مسجون ..

عبدالله وهو مصدوم : مسسجووووون !!
غيداء نزلت راسها : أييه ..
عبدالله : ومن متى ؟؟
غيداء : من سنه ..
عبدالله : مشاري مسجون .. آآآآخ .. بس ليش ؟؟
غيداء : متهم بترويج المخدرات
عبدالله : مشاري يروج مخدراااات ..
غيداء : لا .. لا هو مظلوم مشاري ما يسويها .. حتى عماني وعيالهم واثقين فيه ..

عبدالله : لا حول ولا قوة إلا بالله ... طيب وغادة ..
غيداء : غادة طيبه وهي للحين عند أبوي ( غيداء ما قدرت تتحمل أكثر .. ضمت يدينه لوجهه وجلست تصيح )

....... عند أحمد .. شاف الساعة ( الحين لهم أكثر من نص ساعة .. أكيد خلص الفلم الهندي ) ابتسم على فلم هندي وراح داخل .. ولما قرب من باب الصالة سمعهم .. ووقف مكانه ......

عبدالله خاف : غيداء وش فيك ؟؟ غادة فيها شي !! أرجوك تكلمي ..
غيداء أبعدت يدينه عن وجهه : عبدالله .. أنا أفتقد غادة .. أشتقت لها أبي أشوفها .. أنا حاسه أنها حزينه .. في الليل ما أقدر أنام لأني أحس بها تصيح .. عبدالله تعبت وأنا أكتم أحزاني .. كتمتها عنكم لما كانت أمي حيه .. وكتمتها عن غادة و رولا لما كنت عند أبوي .. لما كان أبوي يضرب غادة كنت أحسه يضربني أنا .. لما يسبها كنت أحسه يسبني أنا .. بس صبرت وكتمت عشان غادة .. ما أبيها تشوفني منهارة .. والحين أنا أكتم شوقي لغادة عشان أحمد .. ما أبيه يحزن بسببي .. أحمد ما يستاهل أني أحزنه وهو ببداية زواجه .. بس تعبت .. تعبت .. تعبت .. ( وزاد صياحها )

عبدالله ضمه لصدره وخلاها تصيح لين حسها هدت ..
عبدالله : غيداء .. وش تبيني أسوي عشان ترتاحين ؟؟
غيداء : لا تتركني .. أبيك تكون معي دائما ..
عبدالله ابتسم : وأحمد ؟؟؟
غيداء : وش فيه ؟؟
عبدالله : ما يرضى ..
غيداء : ليش ؟؟

قطع عليهم أحمد : بس .. زوجتي وأنا حر .. ألا إذا كانت زيارات خفيفة .. أما دائما .. لا..لا..لا.. أصلا أنا ما أحب أشوفه ..

عبدالله : ههههههههه .. ومن هو ألي أصر أني أحظر زواجه ؟؟؟
أحمد : أممم .. خلني أفكر .. يمكن بدر ولد عمي ..
عبدالله : لا .. لا خطأ .. أقول لا تسوي نفسك بريء ..
أحمد : ههههه ..

عبدالله ألتفت على غيداء .. وبنظرات حنونه : غيداء .. أنا متأكد أنك راح تسعدين مع أحمد .. وأنا واثق فيه .. وأنت ما شاء الله عليك ما تحتاجين أني أوصيك عليه ..

أحمد : عبدالله .. تدري أنك أول مرة تمدحني .. لا لا أنت مانت بعبدالله ألي أعرفه ..

عبدالله : أقووول .. ممكن تسكت شوي .. أبي أكلم أختي ..
أحمد : ههههههه .. لا رجعت عبدالله صديقي البغيض ..
عبدالله : ههههههه .. يا ناس جوعان من قمت ما أكلت شي

غيداء ابتسمت : ههههه طيب شوي وهو عندك ..

قامت غيداء عنهم ودخلت المطبخ وقالت للخدامه تجهز الفطور ... طبعا الخدامه كانت لأهل أحمد بس هم خلوها عندهم حتى تخدمهم لأنهم معاريس .. ورجعت لمهم ومعه الفطور ..

وبعد ما تعبوا جلسوا من التعب .. وكلهم منحاسين من الصابون والماء .. والفرش والكنبات معفوسه فوق تحت ..
ياسر : حرام عليكم .. ما صدقت نخلص مرتبين وتقومون تحوسون ..
صالح : أحسسن ..
فهد : وعع .. قوموا نغير ملابسنا ..
ماهر : لا لا حرام عليكم أنا توني مخلص من غسيل الثياب
خالد : ما علينا منك .. أغسلهن مرة ثانيه ..
ماهر : منب فاضي لكم .. خدام أنا عندكم .. أقووول وش رايكم نوديهن عند أحمد حتى تغسلهن زوجته !!
عبدالله : نععععمممممم .. عد ما سمعت وش تقول ..
ماهر : لا آسف ما قلت شي .. أصلا نسيت انك أخوها ..
عبدالله : أجل تأكد مرة ثانيه ..
ماهر : خلاص نوديهن عند المغسلة .. الثوب بريال
صالح : عليك أنت تدفع الفلوس ..
ماهر : لا والله .. ليش شايفني موظف وأستلم راتبي كل شهر ..
عبدالله : كأنك تلمح علي أنا ..
ماهر : ماشاء الله عليييك .. تعرف تحل الألغاز ..

عبدالله : أنا بروح أغسل ثوبي وثيابكم .. بس بشرط أدفع عن طلاب الثانوية والمتوسطة .. لأنهم ما عندهم رواتب .. بس الجامعيين والموظفين يدفعون ..

ماهر ومؤيد ويزيد : يحيا العدل ..
ياسر : طيب والفرش والكنبات من يرتبهن ..
عبدالله : طلاب الثانوية .. لأنهم ما دفعوا شي ..
ماهر ومؤيد ويزيد : لااااااااا ...
فهد : غصب ...
خالد : والصحون والأرضية ..
عبدالله : على طلاب التوسطة ..
علي وماجد : ليش علينا الصعب ..
ياسر : أعتقد أن عبدالله حل المشكلة .. يالله كلن يباشر شغله ..
ماهر ومؤيد ويزيد وعلي وماجد : لااااااا ....

عبدالله : لحظة ياسر أنا ما خلصت ..
ياسر : وش بقي ؟؟
عبدالله : بالنسبة للموظفين والجامعيين ألي ما يبي يشتغل يدفع للشباب الصغارين لأنهم راح يشتغلون عنهم .. بس ألي يشتغل ما يدفع ..

ماهر ومؤيد ويزيد وعلي وماجد : ههههههه .. يحيا العدل ..
مؤيد : بكذا كلهم راح يشتغلون حتى ما يدفعون ..
يزيد : ههههههههه أحسن ..
صالح : أشوفكم فرحين ..
ماجد : اكييييد .. ياتشتغلون معنا يا تدفعون لنا ...

محمد : عبدالله وش هالمهزلة !! خليتنا ضحكة لهم ..
عبدالله : أنا أحكم بالعدل ..
محمد : أي عدل .. تبي تدفع عنهم فلوس غسل الثياب وتبينا ندفع لهم بعد ..

فهد : أنا أشوف أن رأي عبدالله هو الصح ..
خالد : وأنا بعد ..

....... قاموا كل الشباب .. طبعا هم لما يجون لبريدة الحريم في البيوت والشباب في الإستراحة .. هالإستراحه لعيال عم أحمد .. وكانوا يجتمعون فيها كلهم (عيال عمانه وعيال خواله ) من المتوسط والثانوي والجامعي والمظفين العزابيين .. ماشاء الله عليهم كثارييين ... عشان كذا دائما يتهاوشون على الشغل ..

....... طلع عبدالله ومعه ملابسهم وراح يوديهن للمغسله ورجع ..
فهد : خلها معك ..
عبدالله : لا أنا بروح للرياض عندي شغل ضروري هناك ..
فهد : لا يا رجال عشاك معنا اليوم ..
ماجد : عبدالله أجلس للعشاء .. ونوعدك ما نتهاوش على الشغل

الكل ضحك عليه ..

عبدالله : آسف والله ما أقدر .. بعدين أنا لازم أكون بكرا بأبها .. فما يمديني أروح لرياض ..
فهد : خلاص براحتك .. أهم شي تكون مرتاح
عبدالله : مشكور الله يعافيك .. يالله سلام شباب مع السلامه ..
قاموا كلهم حتى يسلمون عليه ..
عبدالله : لا إله إلا الله .. كلكم تبي توادعوني ..
مازن : هههههههه .. تبي توجعك رقبتك من كثر ما تسلم علينا ..
ياسر : عادي .. متعود من أمس في العزيمة ..

..... وادعهم عبدالله وطلع .. وكان ناوي يروح لمشاري ..
اتصل على أحمد وغيداء وسلم عليهم ووادعهم .. كان طول الطريق للرياض وهو يفكر بمشاري ..(كان مسجون وأنا ما أعرف .. أخوي ولا أعرف عنه شي .. بس كيف بواجهه عقب كل هالسنين .. ما أقدر .. ما أقدر) .. كان أحيانا يجزم أنه يروح له وأحيانا يحس أنه ما يقدر يواجهه ..

واخيرا وصل الرياض بعد أربع ساعات .. وقف وصلى المغرب .. وقرر أنه بالبدايه يروح يزور قبر أمه .. كان كل شهر يزورها .. وله أسبوعين زايرها بس حب يزورها مرة ثانيه

......... ويوم طلع من المقبرة كانت حالته منهارة من الصياح مثل كل مرة .. ركب السيارة ومازالت ذكرى أمه في باله .. تقاسم مع أمه ظلم أبوه .. كان لما يضربها ابوه يدافع عنها بس أبوه يضربه معها .. كان يمسح على جراح أمه وتمسح على جراحه .. كان يضم أمه ويبكون مع بعض .. أما مشاري فكان هادئ .. ويكره الضرب فكان يتحاشى أبوه لما يكون موجود .. كان ينام أو يتخبا بغرفه ويلعب .. وإذا سمع صوت أبوه وهو يصارخ على أمه يحط أصابعه باذانه حتى ما يسمع ويجلس يصيح .. لأانه يعرف انه يضرب أمه .. فيضل على هالحال لين ينام وهو يصيح .. هذي حالة طفلين عاشوا مع أب ظالم ..

..... دارت هالذكرى على بال عبدالله .. حاول يجمع قوته حتى يروح بيت عمه ويسألهم عن مشاري .. أكييد عمر يعرف كل شي عنه .. راح ويوم قرب من بيت عمه انهارت قوته .. ولا قدر يقرب أكثر .. غير أتجاه السيارة وراااااح لأبها ..

............... مر أسبوع

عبدالله حالته النفسية السيئة زادت من يوم عرف أن مشاري مسجون ..
أحمد وغيداء .. سافروا لشهر عسلهم ..

أما المعاريس سامي وسارة انتهت سفرتهم .. وأبو سامي وأبو عمر .. قرروا يسوون لهم عزيمة أول ما يرجعون ..

طبعا بدوا يعزمون الناس ,, وكان من المعزومين أهل نواف وأهل محمد وأسامه .. وأبو فهد .. وأبو عبدالله بمناسبة تعدل الأوضاع بينهم ..وطبعا وخوالهم ومعارفهم .. كانت حفلة كبيرة ..
........... ..... .... .....

هند : ايييششش !!! تبيني أنا أروح لحفلتهم ..
سليمان : أيه وش فيها !! أبي فارس يعرف عيال عمه ..
هند : خلاص رح أنت وولدك .. أنا ماني رايحه
رولا : يمه أرجوك نبي نروح .. حتى أنا أبي أعرف بنات عمي .. حرام كل صديقاتي بالمدرسة يتكلمن عن بنات عمهن ألا أنا ..

هند طرت على بالها فكرة : خلاص بروح عشان أبوك وعشانك .. بس بشرط غادة ما تروح ..(قالتها وهي تناظر أبو عبدالله )

سليمان : ومن قال أنها تبي تروح !!! أصلا مابي غادة تتعدا باب البيت ألا للمدرسه وبس ..
رولا : لا ليش يبه ؟؟؟

سليمان : ولا كلمة ما أبي أحد يعارضني في هالبيت ..
رولا : أجل أنا منب رايحة ..
هند : رولا .. ماتسمعين كلام أبوك .. تروحين معي غصب عليك .. ولا أبي أسمع منك كلمه .. قومي عن وجهي يالله ..

قامت رولا وهي زعلانه وكانت تبي تروح عند غادة
هند : روحي فوق لغرفتك ..

..... راحت رولا لغرفته ويوم شافت أمها وأبوها أبعدوا عن الصالة راحت لغادة ..
..........

نواف : وش رايك يمه ؟؟ الرجال عازمنا ومصر أننا نحظر ..
أم سعد : والله يا وليدي أنا ماعندي مانع ..
أمجاد : يمه بس ماعندنا ملابس للحفلة ..
نواف ابتسم : ما عليه .. نروح نشتري ..
نورة : صدق ؟؟؟
نواف : أيييه .. ليش منتي مصدقة !!
نورة قربت من أخوها وحبته مع جبهته ..
نورة : مشكوووووور نواف
نواف : أن شاء الله دوم هالفرحة ..
ليان : وأنا .. وأنا أبي ملابس جديدة ..
نواف : أنت تأمرين أمر ..
أم سعد : بس يا وليدي معك فلوس كافيه ..
نواف : لا تخافين يمه معي فلوس إن شاء الله تكفي ..
أم سعد : نواف معي سلسال ذهب بعه وخذ فلوسه ..
نواف : لا يمه خليه معك .. الفلوس ألي معي تكفي
أم سعد : لا ما تكفي .. خذ الذهب وبعه ..
نواف : يمه الله يهديك معي فلوس تكفي .. والذهب يمكن نحتاجه بعدين
أم سعد : خلاص يا وليدي ألي تشوفه ..
نواف : الله يحفظك لنا يالغاليه ..

نواف ناظر ساعته وقام بيطلع : يالله يمه تامرين على شي ؟؟
أم سعد : الله يحفظك ويسلمك ويوفقك وين ما كنت ..

نواف حب رأس أمه وراح حتى يطلع

أمجاد : نواف تبي تطلع ؟؟
نواف : أييه .. اليوم دوامي مسائي ..
نورة : طيب متى نروح للسوق ؟؟
نواف : متى ما بغيتي .. بكرا أو بعدة ..
نورة : بكرا ..
نواف : ههههه .. أشوفك مستعجله ..
نوره : مررررره ..
نواف : خلاص بكرا .. بس بشرط نروح العصر لأن دوامي بأول العشاء
نورة : ما عندي مانع .. إذا بغيت نروح الظهر ..
أمجاد : هههههه .. أنا بصراحة ما أعرف ليش تحبين السوق !!!
نوره : بس كذا ..
أمجاد : مع السلامه نواف .. أنتبه لنفسك ..
نواف : حاظر مام ..

............ طلع نواف من البيت ..

كانت ليان تلعب بحوش البيت سمعت صوت الجرس .. وطارت بسرعه حتى تفتحه .. وأول ما فتحته .. دفع الباب بقوه ودخل .. مسكها مع ملابسها وصرخ عليها ....

..... : وين أمك ؟؟
ليان بدت تصيح وكانت خايفه منه : داخل ..
تركها وليان طارت بسرعه حتى تحتمي بأمها ..
أمجاد : ليان وش فيك حبيبتي ؟؟
ليان صاحت
أم سعد : وش فيها ؟؟
أمجاد : ما أعرف هـ .... ( سكتت يوم شافته يدخل )
أم سعد : ســــعــــــــــــــــــــد

سعد : أييه سعد .. وعندك مانع أدخل البيت ..

أم سعد قربت الجوال من يد أمجاد من دون مايشوف وعطتها الجوال
أم سعد بهمس : أمجاد روحي وسكري عليك وعلى خواتك الغرفه ولا تطلعين فاهمة ..

سعد يصارخ : وش عندكن ؟؟
راحت أمجاد ودخلت الغرفة وهي تصيح ..
نوره خافت يوم شافت أمجاد وليان يصيحن
أمجاد قفلت الباب وجلست وضمت ليان لصدرها

نورة : أمجاد وش فيك ؟؟
أمجاد : سعد جاء .
نورة شهقت : سعد ... ومن ألي فتح له الباب ؟؟

أمجاد أبعدت ليان عنه وكلمته : ليان كم مرة قلنا لك لا تفتحين الباب لسعد
ليان : ما عرفت أنه سعد .. كنت أضنه نواف ..
أخذت أمجاد الجوال واتصلت على نواف

نواف دخل لمركز عمله وكان يشتغل بالإستقبال ..

نواف : السلام عليكم ..
سعود : وعليكم السلام .. وش عندك جاي مبكر ..
نواف : مبكر ؟؟؟ ( ناظر ساعته ) لا متأكد دوامي يبدأ الحين ..
سعود : شف الجدول ..
نواف ناظر الجدول : هههههه .. لا أنا كنت أضنه الساعه سبع ما عرفت أنه ثمان
سعود : باقي ساعة ..
نواف : تبيني أساعدك .. أسولف معك ..
سعود : ههههه .. سولف .. لأني ملييت ..
نواف : مثل العادة .. كل يوم تقول مليت ..

رن جوال نواف ورفعه ..
نواف : هلا والله ..
أمجاد وهي تصيح : نواف ألحقنا ..
نواف قام من كرسيه : أمجاد وش فيك ؟؟
أمجاد : سعد .. سعد جاء للبيت .. أخاف يضرب أمي ..
نواف : طيب أنا جاي ..

سعود : سلامات ؟؟؟
نواف طلع بسرعه : سعود يمكن أتأخر ..
سعود : الله يحفظك ..

...... أمجاد سكرت الجوال وراحت عند نورة ..
نورة كانت واقفة عند الباب وتتسمع .. وليان واقفة بجنبها
أم سعد : ما عندي فلوس ..
سعد يتطنز : واضح أنه ما عندك فلوس .. والأثاث الجديد منوين لك فلوسه ؟

أم سعد ما ردت ..

سعد : عطيني فلوس .. ما تفهميين !!
أم سعد : تبيني أعطيك فلوس حتى تأكل بهن السموم .. مافيه أم تعين ولده حتى يقتل روحه ..
سعد : أسكتي ولا كلمه ( وعطى أمه كف )

أمجاد يوم سمعت أن سعد ضرب أمها .. ما قدرت تصبر .. فتحت الباب وراحت عندها ..
أمجاد : يمه ..
أم سعد : روحي يا بنتي ليش طلعتي ..
أمجاد : لا ما راح أدخل ألا وأنتي معي ..

سعد كان يفتش بالبيت يدور على الفلوس أو أي شي ينتفع به .. بس ما حصل شي .. راح لأمه ..

سعد : أنتي يالعجوز وين فلوسك ؟؟
أمجاد : لا ترفع صوتك على أمي ..
أم سعد : أمجاد أسكتي ..

سعد ضرب برجله على بطن أمجاد .. بعدين صار يناظرها وخطر على باله فكرة ..

مسك أمجاد من شعرها .. وقربها منه ..
سعد : أنت تجيبين لي الحبوب من دون فلوس ..
أم سعد : لااااا .. خل بنتي .. وأعطيك الفلوس ألي تبي ..
سعد : اسكتي أنتي ولا كلمه ..

وصار يسحب أمجاد وهي تصرخ ..

نورة وليان كانن يشوفن من بعيد .. بس نورة يوم شافت أن سعد بياخذ أمجاد راحت بسرعه ومسكت أمجاد مع أمها حتى ما ياخذها ..

سعد : أتركيها يا الـ****** أتركيها ..
أم سعد : لااا بنتي خلها .. خلها ..

أمجاد كانت تصارخ من بينهم ..

نوره : أتركها .. أتركها ..
سعد يوم شاف أنهن ماسكاتها بقوة .. رفع رجلة وضرب أمه ونورة ..
أم سعد ونورة طاحن بالأرض ..
وسعد طلع وهو يسحب أمجاد معه .. وأم سعد انهارت و ما قدرت تتحرك
أم سعد : أمجاااد .. جبها يالعاق .. خل بنتي
طلع سعد وهو يجر أخته .. وأمجاد تصارخ وتحاول تفلت منه
..
::
::
::
::
::
::
::
::
::
تابعوني في الجزء العاشر

الجــــــ 10 ــــــــــزء

كان ماسكها من شعرها ويسحبها في حوش بيتهم ..
سعد : قومي يالـ***** .. قومي

ويوم كمل جملته ضربه أحد من وراه بقوه وطاح على الأرض

سعد ألتفت يناظر من يكون ..

سعد : نواااااف !!

نواف : أييه نواف .. وين كنت تبي تاخذها يالحقير ؟؟
سعد : لا ترفع صوتك .. بعدين متى طلعت من السجن ؟؟
نواف : مالك دخل ..

سعد وقف : وخر عن طريقي ..
نواف أبعد عن طريقه : تفضل برا .. ..

أمجاد كانت جالسه في الارض و رجولها ماتقدر تشيلها ..

مسكها سعد من شعرها ..
نواف ضربه وأبعده عنها : خلها ..
سعد : شو يخصك أنت !!
نواف : أختي .. يالله أطلع برا ..
سعد مسك نواف وقربه لمه : لا ترفع صوتك علي
نواف يعاند : أطلع برا ..

سعد عصب حييييييل .. وضرب نواف .. نواف رد عليه وضربه .. وصاروا يتضاربون .. وأمجاد تناظرهم وتصيح ..

نواف كان أقوى من سعد .. لأن سعد فقد قوته بسبب المخدرات ..

سعد أبعد عن نواف وطلع مسدس وصوبه على نواف ..
نواف يوم شاف المسدس وقف وهو منصدم .. شاف أمجاد وحزن عليها
( يعني لو قتلني بياخذها معه .. وبياخذ نورة بعدها .. وأمي وش راح يصير لها !!! )

دارت أفكاره بسرعه .. مر عليه شريط حياته بسرعة البرق .. أيام طفولته .. وأبوه وأمه .. أيام شبابه .. و المخدرات والسجن .. أيام توبته .. ومشاري وتركي وعمر وسعود .... وغيرهم .. مرت عليه ذكراهم بلحظه ..

بس توقف تفكيره يوم شاف أمجاد تقوم من ورا سعد وتقرب منه بهدوء حتى ما ينتبه لها .. نواف فهم وش راح تسوي .. و استعد ..

سعد : أشوفك ساكت ..
نواف : حقييييرررررر ..
سعد : هههههه راح تندم على هالكلـ ...... وخري عني يالـ***

أمجاد جت من ورا سعد ومسكت المسدس ألي في يده .. ونواف هجم بسرعه على سعد وقدروا يأخذون المسدس منه

سعد يوم أخذوا المسدس منه هرب بسرعه وطلع من البيت ..

أمجاد جلست على الارض تصيح .. ونواف واقف ويتنفس بسرعه

.. رمى السلاح ألي في يده بالأرض .. وقرب من أمجاد وضمها .. وجلست تصيح بحضنه .. ساعدها حتى تاقف .. وراح داخل البيت ..

دخل شاف أمه طايحه بالأرض وتصيح .. ونورة بجنبه ..

نورة وقفت عن الصياح يوم شافت نواف داخل وهو ماسك أمجاد
نورة : أمجاااد ..
أم سعد رفعت راسه يوم سمعت نورة .. وشافت أمجاد .. ورفعت يدينها حتى تضمها .. وأمجاد قربت من أمه ورمت نفسها بأحضانها وجلست تصيح ..

نواف أبعد عنهم شوي وسجد سجدة شكر ( اللهم لك الحمد كما ينبغي لجلال وجهك وعظيم سلطانك .. اللهم لك الحمد على أن قدرتني لأن أمنع الأذى عن أختي ) ورفع من السجود .. وصرخ
نواف : لاااااا ..
أمه وأمجاد ونوره ناظروا مكان ما يناظر .. وشهقوا ..

قامت نوره لليان ألي واقفه مكانه عند الباب و عاملتها على ملابسها

ليان كانت تصيح بصمت .. ومن خوفها متصنمه مكانها

نورة : ليان حبيبتي .. وش فيك ؟؟
ليان ما تكلمت ..

قام نواف وراح لمها ..
نواف : ليان حبيبتي .. خلاص شوفيها أمجاد رجعت .. وكلنا بخير ..

ليان انفجرت تصيح بقوة ورمت نفسه بأحضان نواف
ليان : أنا ما أحب سعد .. ما أحبه .. أكرهه ..
نواف : خلاص حبيبتي .. خلاص لا تصيحين ..
نورة : ليان أبعدي عن نواف شوفي حستي عليه ملابسه ..
نواف : ما عليه نوره خليها ..
قام وشالها : يالله ليان روحي مع نورة و تسبحي وغيري ملابسك ..
ليان : أخاف يجي سعد وياخذني .. تعال معي ..
نوره : ليان أنا أروح معك .. نواف بيروح يسبح و يغير ملابسه
ليان : وسعد ..
نوره : خلاص سعد راااح .. ولا راح يرجع ..

ليان تناظر نواف : إذا جاء سعد وناديتك تعال بسرعه ..
نواف : ههههههه .. خلاص إن شاء الله ..
نورة : ليان حبيبتي سعد راااح ..
ليان : إذا جاء مرة ثانيه ما راح أفتح له الباب ..
نوره : إن شاء الله .. يالله بسرعه قبل يدخلك البرد ..

رن جوال نواف وطلعه .. شافه ورد
نواف : هلا والله
سعود : طمني يا رجال .. سلامات وش فيهم أهلك !!
نواف : لا الحمد لله بخير .. كل شي تمام ...
سعود : ريحتني .. من يوم طلعت عجزت أشتغل من الخوف عليك
نواف ناظر ساعته : أفف .. آسف تأخرت عليك
سعود : لا عادي أهم شي تكون بخير ..
نواف : الله يسلمك .. شوي وأنا جايك ..
سعود : مع السلامه
نواف : بأمان الله

......... سكر نواف الخط وناظر أمه .. شافها تمسح على راس أمجاد
نواف : نامت ؟؟؟
أم سعد وهي تمسح دموعها : أيييه ..
قام نواف وحب أمه مع راسها : عن أذنك يالغاليه بروح أسبح بسرعه وطالع زميلي بالعمل ينتظرني ..
أم سعد : الله يحفظك

وبعد ما طلع نواف شاف المسدس بالأرض .. قرب وأخذه وطلع من البيت .. وراح مركز الشرطة ..

نواف : السلام عليكم ..
الضابط قام وسلم : وعليكم السلام .. تفضل أخوي أجلس ..
نواف وهو يجلس : الله يسلمك
الضابط : أمرني يا خوي .. أي خدمة ..

نواف طلع المسدس من جيبه وحطه على الطاولة ..
الضابط : وش قصة المسدس ؟؟
نواف : والله يا طويل العمر .. القصة وما فيها أن أهلي اتصلوا وقالوا لي أن فيه حرامي في البيت .. ويوم رحت هددني بالسلاح بس الحمد لله ربي أعاني قدرت عليه وأخذت المسدس منه .. وجيت بالسلاح لكم ..
الضابط : والحرامي ..
نواف : هرب ..
الضابط : طيب أنت تعرفه ؟؟
نواف ما حب أنه يبلغ عنه لأنه مهما كان أخوه : لاء
الضابط : طيب وش كانت مواصفاته
نواف : ما أعرف .. هو كان متلثم ..
الضابط : سعودي ؟؟؟
نواف : أيه ..
الضابط : طيب هو سرق شي من ممتلكاتكم ؟؟
نواف : لاء ..
الضابط أخذ المسدس وأرسله حتى يأخذون البصمات ..
نواف : بس أكيد بتكون بصماتي عليه ..
الضابط : عارف .. عشان كذا لازم نأخذ بصماتك .. عشان نفرق بينها وبين بصمات صاحب المسدس .. وغير كذا لازم نأخذ رقمك وصورة من بطاقتك ..
نواف : بس يا ليت تأخذونها بسرعه .. لأنه وراي دوام
الضابط : حاظر يا خوي .. تفضل مع الجندي حتى يأخذ البصمة وصورة البطاقة .. ونشكر لك تعاونك ..
نواف : العفو ..
.....................................
.....................................

نواف وصل أهله لقسم الحريم .. وراح هو لقسم الرجال ..
دخلت أمجاد وأمها وخواتها
أمجاد : يمه عطيني عباتك ..
نورة : أمجاد والله خايفه .. ما نعرف أحد
أمجاد : عاااادي وش فيها .. أول شي لازم نعرف أمهات المعاريس وانسلم عليهن ..
ليان : أمجاد شوفي شعري مو حلو ..
أمجاد جلست تعدل شعر ليان ..
...... : عفوا أنتم ......... ( ذكرت أسم العائلة )
نورة : أييه ..
البنت ابتسمت وسلمت عليهم : أنا بشرى الـ..... أخت العريس ..
أمجاد : هلا والله .. أنا أمجاد وهذي أختي نورة
بشرى : أمممم .. آسفه على تأخري كان المفروض أستقبلكم .. بس من يوم أتصل أخوي وقال لي أنكم وصلتوا .. وأنا أدور عليكم ولا قدرت أميزكم من بين الناس ..

نورة : الله يسلمك .. عادي حصل خير .. بعدين حنا أنشغلنا بتعديل أنفسنا
بشرى وكأنه تدور على أحد : ألي أعرفه أن أمكم بتحظر ..
أمجاد : أييه هي حاظرة .. شوفيها تنتظرنا هناك ..
بشرى : أجل بروح لمها أمي تنتظرها .. وأنتم ماخلصتوا ؟؟
ليان : لااا ... أنا ما خلصت ..
بشرى نزلت لمستواها : وش اسمك يا حلوه ؟
ليان : ليووونه ..
بشرى : وليش ما خلصتي يا ليونه ..؟؟
ليان : أبي روود ( روج )
بشرى : ههههه .. أمجاد ليش ما تحطين لها روج ؟؟
أمجاد : ربي يعين عليها ( وطلعت مرطب شفايف وحطته لها بس عشان تسكت )
ليان تسأل بشرى : حلووو ؟؟
بشرى : أييه حلو .. يالله شوفي ماما تنتظرنا ..
راحوا البنات لم ام سعد وبشرى سلمت عليها .. ودخلتها عند الحريم .. وليان تركوها تلعب بقسم الأطفال
بشرى : يمه .. هذي أم نواف .. صديق تركي
أم سامي : هلا والله بأم نواف .. حياك الله ..
أم سعد : هلا بك .. الله يحييك ..
أم سامي : أنا أم سامي .. ماشاء الله هذولي بناتك ..
أمجاد و نورة سلمن على أم سامي ,, وأم سامي رحبت بأم سعد وضيفتها
وجلسن البنات بطاوله لحالهن ..
بشرى رن جوالها .. وردت
بشرى : هلا تركي ..
تركي : هلا بشرى .. شوفي أم محمد وصلت ..
بشرى : طيب كيف أميزها عن الحريم ؟؟
تركي : شوفي معها ثلاث بنات صغار ,, وحدة منهن معاقه ولها ولدين أصغر من البنات ..
بشرى : أممم .. طيب .. مع السلامه ..

بشرى تناظر البنات (أمجاد ونورة )
بشرى : بنات عن اذنكن .. بروح أستقبل وحدة وجايه على طول ..
أمجاد : خوذي راحتك ..

راحت بشرى ..
نورة : ماشاء الله عليها مررره طيبه ..
أمجاد : أييه .. الله يجزاها خير ..

... رجعت بشرى وكان معها وحده من الحريم وراحت عند أمها وأم سعد ..
بشرى : يمه هذي أم محمد ..
ام سامي : هلا والله بام محمد .. أنا أم سامي ..

تركتهن بشرى وراحت عند البنات ..
بشرى : إن شاء الله ما تأخرت عليكم ..
أمجاد ابتسمت : لا عادي ..
نورة : أمممم بشرى .. تو كنا نتكلم عنك ..
بشرى : وااو .. الله يستر , وش قلتن عني ؟
أمجاد : لا ماشاء الله عليك .. أدب وأخلاق ولا مانتي واثقه من نفسك ..
بشرى : هههههه .. أدب وأخلاق الله يسلمكم .. ليت نهال ولا سارة يسمعنكن ..
نورة : ومن هن نهال وسارة ؟؟
بشرى : بنات عمي .. سارة هي العروس وزوجة أخوي ونهال أخت سارة
أمجاد : وأنتي ما لك خوات ..؟؟
بشرى : لاء .. لي ثلاث أخون بس .. وأنا رضعت مع ولد عمي أخو نهال ..
نورة : ونهال وينها ؟؟ بصراحة ودي أشوفها ؟؟
بشرى : نهال عند أختها .. خلتني أنا أستقبل الزوار وهي جالسه عند سارة لين يزفونها .. بس أحسن خليها تفوتها شوفتكن ..
أمجاد : الله يسلمك ..
بشرى : أمجاد كم عمرك ؟؟
أمجاد : 19 سنه
بشرى : يعني بنفس عمري .. وأنت نورة ؟؟
نورة : أنا أصغر من أمجاد بسنتين .. ونهال كم عمرها ؟؟
بشرى : نهال بعمرك .. هي اصغر مني بسنتين ..
أمجاد : بشرى وش فيه هناك ؟؟
بشرى تناظر : ويين ؟؟
أمجاد : عند الطاولة ألي فيها أمي ..
بشرى : ما أعرف .. بس صدق ليش الفوضى هناك !!!
نورة : زيين تركونا من الناس ..
بشرى : صدقتي .. ) ويرن جوالها (
بشرى ترد : هلا يالدبه .. ههههه .. أحسن ..لا أنا جالسه مع أمجاد ونورة .. صديقاتي .. وش عليك أنتي خلي أختك تنفعك .. خلاص سامحتك تعالي عندي في ......... أنتظرك ..
بشرى سكرت الخط : ههههه نورة هذي نهال جت ..
نورة : صدق !!
بشرى : أيييه .. تقول ملت من أختها ..

نهال : السلام عليكم ..
قامن أمجاد ونورة وسلمن عليها .. وجلسن شوي يسولفن ..
نهال : بشرى .. شفتي وش ألي حاصل هناك ؟؟
بشرى : لا .. بس أستغربنا يوم شفنا الفوضى بين الحريم
نهال : فاتكن .. أخت وشافت أختها بعد سنييين من الفراق ..
نورة : معقوووله !
نهال : ما شفتن الصياح والعناق الحار .. بصراحه بغيت أصيح ..
بشرى تعلق عليه : ماشاء الله عليك حنونه ..
نهال : لا تتطنزين .. بس تخيلت أن محمد يحرمني من تهاني و أخوك يحرمني من سارة ..
بشرى : والله ؟؟؟
نورة : ههههههههه .. نهال خيالك واسع .. سويتي قصه مأساويه ..
نهال : أيييه أضحكن .. وش عليكن أنا بس ألي تنجرح مشاعري ..
بشرى : هههههههه يا الرقيقه ..
أمجاد : خلاص خلوكم من نهال .. والله ما تستاهل ..
نهال : حبيبتي أمجاد ..
أمجاد : أمممم .. عن اذنكم بروح أتطمن على ليونه وجايه ..
بشرى : خلني اروح معك ..
نهال : فكه .. حتى أجلس مع نورة لحالنا ..

........ راحت أمجاد وبشرى للقاعه ألي فيها ألعاب الأطفال ..
بشرى : شوفي ليوونه هناك ..
أمجاد : الشريرة وش قاعدة تسوي !!
بشرى : هههههههه ..

ليان كانت تتهاوش مع واحد من الأطفال ألي بعمرها ..
امجاد : بس ليوون .. وش فيك على الولد ؟؟
ليان : هو خرب شعري ..
البراء : سادة .. ليش ما تخليني العب بهذي اللعبه ..
أمجاد : ليان .. ليش ما تخلينه يلعب ..
ليان : بس .. انا جييت قبله ..
بشرى : وش أسمك ؟؟
البراء : البراء ..
بشرى : حلو أسمك .. عاجبني .. آخذه ؟؟
البراء : لا .. أنتي وش اسمك ؟؟
بشرى : أنا البراء ..
البراء : لا أنا البراء ..
بشرى : خلاص أنا بشرى ..
بشرى : أمجاد .. أنا تو شفت هذا الولد مع المرأة ألي أستقبلتها عقبكم وكان له ثلاث خوات صغيرات ..
أمجاد : البراء .. وين خواتك ..؟؟
البراء : هناك .. عند أماني ..
أمجاد : من أماني ؟؟
بشرى : وحدة من خواته معاقه وسمعت أمها تناديها بأماني
أمجاد : أمممم .. خلاص ليونه خليه يلعب شوي ..
ليان : لااااااء ..
أمجاد : ترا بقول لنواف
ليان : أصلاً نواف يحبني ..
أمجاد : وااااثقه .. طيب حبيبتي خليه يلعب شوي بس .. خلوكم اصدقاء مرة تلعبين أنتي ومرة هو يلعب ..
ليان نزلت : خلاص ..
بشرى : أخيرا أقتنعت .. تعال البراء حتى تلعب ..
جلس البراء يلعب هو ليان .. وأمجاد وبشرى يناظرونهم ..
بشرى : ما شاء الله قبل شوي يتهاوشون والحين زي السمن على العسل
أمجاد : ههههههه .. صدقتي ..

..... جت بنت صغيرة ..
إسراء : البراء تعال ماما تبيك ..
البراء : لا أبي ألعب مع ليان ..
ليان : تعال نروح عند ماما بعدين نجي نلعب ..
البراء : تعالي شوفي ماما ..

.... أمجاد : ههههههههه .. ماشاء الله عليهم صداقتهم حميمه ..
بشرى : ههههههههه .. تعالي أنشوفهم

.... راحن أمجاد وبشرى وراهم ..
أمجاد : بشرى .. مو ذيك أمي ؟؟
بشرى : ألا وألي معها ام محمد ..
أمجاد : شوفي هذي نورة ونهال ..
بشرى : تعالي نشوفهن ..


بشرى : نهال .. وش جابكن ؟
نهال: بشرى .. الخوات ألي قلت لك عنهن قبل شوي طلعن أم نورة وأختها ..
أمجاد : أمي !!!
نورة : أمجاد .. شوفي هذي خالتي مها أم محمد ..
أمجاد : خالتي !!!

أم سعد شافت البنات : أمجاد تعالي سلمي على خالتك ..
أم محمد : تعالي يا بنتي ..
راحت أمجاد وسلمت عليها وضمتها ..
نهال : بشرى بعد ما رحتوا .. جت أم محمد وأم نواف وسلمن على نورة وسألت أم نواف عن أمجاد وقلنا لهن أنكن هنا وجينا حتى تشوف أم نواف عيال أختها أم محمد ..

بشرى : تتوقعين أمي تعرف ؟؟
نهال : أنا لما كنت جايه لكم شفت أمك عندهن وتصيح معهن .. يعني أكييد تعرف لأنها جالسه معهن ..

تسلمــي علــى البــارت

يلا ننتظــرك ولاتتأخــري مــرررة ثــانيــة طيــب